बाँके । बाँके र बर्दियाका करिब १२ प्रतिशत नागरिकले मात्र पाइप प्रणालीबाट खानेपानी उपभोग गर्ने गरेका छन् । ती जिल्लाका ८८ प्रतिशत नागरिक स्वच्छ खानेपानीको पहुँचभन्दा बाहिर रहेको खानेपानी तथा सरसफाइ डिभिजन कार्यालय, नेपालगञ्जका प्रमुख तिलक न्यौपानेले जानकारी दिए ।
उनका अनुसार, दुई जिल्लामा निर्माण हुन लागेका सबै आयोजना सम्पन्न भएमा करिब ९० प्रतिशत नागरिकले पाइप प्रणालीको पानी प्रयोग गर्न पाउनेछन् । अहिले बाँकेमा ८५ प्रतिशत घरधुरीका मानिसले ह्याण्डपम्पको पानी खाने गरेका छन् । १४ हजार एक सय ३० घरधुरीले मात्रै पाइप प्रणालीको पानी खाने गरेका छन् ।
नेपालगञ्जस्थित खानेपानी तथा सरसफाइ डिभिजन कार्यालयले ती जिल्ला हेर्दै आएको छ। कार्यालयले नागरिकलाई स्वच्छ पानी पु¥याउन सघन खानेपानी आयोजना, सरसफाइ तथा ढल व्यवस्थापन, खानेपानी आयोजना गुणस्तर सुधार तथा अभिवृद्धि कार्यक्रम, खानेपानी आयोजना मर्मत सुधार, जलवायु अनुकूलित खानेपानी आयोजना, तराई–मधेस खानेपानीलगायतका आयोजनामा काम गर्दै आएको छ ।
बाँकेमा २०६३/६४ सालदेखि निर्माण सुरु भएका करिब आधा दर्जन खानेपानीका योजना अलपत्र परेका छन् । आयोजना सञ्चालन गर्नका लागि न्यून बजेट, पर्याप्त जनशक्तिको अभाव, उपभोक्ता समितिले चासो नदेखाउनुलगायतका कारणले करिब डेढ दशक पहिलेदेखि निर्माण सुरु भएका आयोजना अलपत्र अवस्थामा पुगेको प्रमुख न्यौपानेले बताए।
विसं २०६३/६४ देखि निर्माण सुरु भएको नेपालगञ्ज १६ जयसपुरमा रहेको खानेपानी आयोजनाको सुर्खेत रोड विस्तारका क्रममा सडकमा रहेको पाइपलाइन काटिएपछि अलपत्र परेको छ। कोहलपुर–१४ हवल्दारपुर नजिकै रहेको शम्शेरगञ्ज खानेपानी आयोजना, राधापुर खानेपानी योजनालगायतका आयोजना हाल अलपत्र अवस्थामा रहेका छन् । यी आयोजना सञ्चालनका लागि डिभिजन कार्यालयले प्रयास गरिरहेको उहाँको भनाइ छ ।
अलपत्र योजना सम्पन्न गर्न उपभोक्ता र स्थानीय सरकारले चासो दिएका छैनन् । बनिरहेका योजना सम्पन्न गर्नेतर्फभन्दा पनि लोकप्रियताका लागि योजना थप्दै जाने प्रवृत्ति बढ्दै गएपछि यसले थप समस्या निम्तिएको छ । एउटा आयोजना सम्पन्न भएपश्चात् मात्र अर्को आयोजनाको सुरुआत गर्नसके आयोजना चाँडो सम्पन्न हुने कार्यालयले जनाएको छ ।
Comments are closed.