पोखरा । कास्की क्षेत्र नं २(क) बाट निर्वाचित प्रदेश सभा सदस्य कृष्ण थापाले साढे २ वर्षे आफ्नो कार्य प्रगति सार्वजनिक गरेका छन् । पोखरामा शुक्रबार पत्रकार भेटघाट गरि थापाले आफ्नो साढे २ वर्षे कार्य प्रगतिमा शिक्षा, स्वास्थ्य र पूर्वाधार निर्माणमा उल्लेख्य उपलब्धी हाँसिल गरेको बताएका हुन् ।
नेकपा कास्कीका अध्यक्षसमेत रहेका सांसद थापाले निर्वाचनमा गरेका प्रतिबद्धता अनुसारै आफूले काम गरिरहेको जिकिर गरे । थापाले भने,‘शिक्षा, स्वास्थ्य र पूर्वाधारमा विशेष जोड दिएर काम गरेको छु । यसका अलावा उद्योग, व्यवसाय र पर्यटनलाई पनि छुटाएको छैन ।’ उनले पूर्वाधार अन्तर्गत सडक निर्माणदेखि पुल निर्माणसम्म, खानेपानीदेखि सिंचाईसम्मलाई प्राथमिकता दिएर काम गरिरहेको उल्लेख गरे । सांसद थापाले नदी तथा ताल संरक्षणमासमेत आफूले बजेट विनियोजनमा भूमिका खेलेको बताए ।
सांसद थापाले कतिपय कामहरु सम्पन्न भइसकेको त कतिपय निर्माणाधीन अवस्थामा रहेको बताए । जस अन्तर्गत कृष्ती बक्रेक पौवेगौडे मोटरबाटो( १२.३ किमी)को बाटो निर्माण भइरहेको र त्यसका लागि ३२ करोड ९० लाख बजेट विनियोजन गर्न सफल भएको बताए । त्यस्तै, आफ्नै पहलमा पोखरा–१७ स्थित ड्यामसाईडमा ४ करोड ८० लाखमा झण्डा पार्क निर्माणको काम भइरहेको र विरौटा–पुँडीटार सडक, रत्नचोकदेखी ड्यामसाईडसम्मको सडकमा फुटपाथ निर्माणको काम भइरहेको थापाले उल्लेख गरे ।
सांसद थापाले एक वडा एक बैंकको अवधारणा अनुसार आफू अघि बढिरहेको बताउँदै अब आफ्नो निर्वाचन क्षेत्र अन्तर्गत पर्ने वडा नम्बर २१ मा मात्र बैंकको शाखा स्थापना गर्न बाँकी रहेको बताए । उनले निर्वाचनताका आफूले गरेका प्रतिबद्धता अनुरुपका बाँकी काम बाँकी साढे २ वर्षमै पूरा गर्ने दाबी गरे ।
सांसद थापाले पोखरा महानगरपालिका ७ र १५ जोड्ने, वडा १५ र ३३ जोड्ने सेती नदीमा पुल निर्माण गर्ने योजना अनुरुप काम अघि बढिरहेको बताए । त्यस्तै, स्वस्थ नागरिक उत्पादनमा जोड दिनका लागि मनोरञ्जन पार्कदेखि जिम पार्क, बाल उद्यान, विश्राम स्थललगायत निर्माणलाई जोड दिइने सांसद थापाले बताए ।
Comments are closed.