पोखरा । पोखरा १७ सीतापाइलामा ‘फिस्टेल ड्रिम फन पार्क’ निर्माण जारी छ । कोरोना महामारी र लकडाउनका कारण फनपार्क निर्माणमा ढिलाइ भएको छ । लकडाउन खुलेसँगै पार्क निर्माणले पनि क्रमशः गति लिएको छ । हालसम्म ८० प्रतिशत काम सम्पन्न भएको बताइएको छ । आन्तरिक तथा बाह्य पर्यटकलाई लक्षित गरी पोखरामा अन्तर्राष्ट्रियस्तरको सुविधा सम्पन्न फनपार्क बनाउन लागिएको मार्केटिङ डाइरेक्टर हिराबहादुर केसीले जानकारी दिए । ६५ रोपनी जग्गामा पार्क निर्माण भइरहेको छ ।
परियोजनामा ४० करोड रुपैयाँ लगानी गर्ने लक्ष्य भएपनि निर्माण समय लम्बिदा करिब १० करोड रुपैयाँ लगानी थप हुने केसीले बताए । ‘निर्माण सक्दासम्म लगानी ५० करोड रुपैयाँ पुग्ने अनुमान गरिएको छ,’ केसीले भने । आगामी वैशाखसम्म पार्क सञ्चालनमा ल्याउने तयारी भइरहेको केसीले बताए । पार्कमा विभिन्न प्रकारका २४ वटा खेलका संरचनाहरु तयार पारिदैछ । फ्रिफल, ५ वटा स्विमिङ पुल, वेव पुल, रोलर कस्टर, १२ वटा इनडोर गेम लगायत विभिन्न गतिविधि पार्कमा समावेश गरिनेछ । सुविधा सम्पन्न रेष्टुरेन्टको सुविधा पनि उपलब्ध हुनेछ ।
‘यहाँ आएका पर्यटकले पार्कमा एक, दुई दिन सजिलै कटाउन सक्छन् । पोखरा आउने पर्यटकको बसाईं अवधि बढाउन समेत पार्कले सहयोगी भूमिका खेल्नेछ,’ केसीले भने । पोखरा आउने आन्तरिक तथा बाह्य पर्यटकलाई लक्षित गरी पार्क सञ्चालनमा ल्याउन लागिएको अपरेसन इन्चार्ज मदनकुमार श्रेष्ठले जानकारी दिए । भारत र चीनबाट सामानहरु आयात गरी पार्क निर्माणको काम धमाधम भइरहेको श्रेष्ठले बताए । ‘लकडाउनका कारण केही सामानहरु आउन ढिला भएको छ,’ उनले भने, ‘अब छिट्टै निर्माणको काम सम्पन्न गर्नेछौं ।’ पोखरामा पर्यटकीय गतिविधि बढाउन पार्कले महत्वपूर्ण योगदान पु¥याउने श्रेष्ठले विश्वास व्यक्त गरे ।
विभिन्न पेशा व्यवसायमा आवद्ध १५ जना व्यवसायीले पार्कमा संयुक्त लगानी गरेका छन् । पार्क सञ्चालनमा आएपछि २ सय जना भन्दा बढीले प्रत्यक्ष रोजगारी पाउनेछन् । ‘नेपालमै हालसम्म सुरु नभएका खेल गतिविधिलाई समेत पार्कमा समावेश गर्ने तयारी भइरहेको छ,’ केसीले भने, ‘यो पार्कलाई नेपालकै नमूना प्रोजेक्टमा रुपमा विकास गर्ने हाम्रो लक्ष्य हो ।’
Comments are closed.